Inspektorati Qendror i Mbikëqyrjes së Tregut (IQMT), në bashkëpunim me Policinë e Kosovës, zhvilloi gjatë mbrëmjes së kaluar një aksion inspektues në disa komuna të pjesës veriore të Kosovës. Kontrollet synuan verifikimin e ligjshmërisë së veprimtarisë së operatorëve ekonomikë dhe respektimin e kushteve ligjore për ushtrimin e veprimtarisë afariste.
Si rezultat i aksionit, u mbyllën shtatë biznese: pesë në Mitrovicë dhe dy në komunën e Zveçanit. Sipas IQMT-së, mbylljet u kryen për shkak të mosplotësimit të kushteve minimale teknike për ushtrimin e veprimtarisë.
Gjatë inspektimeve u konstatua gjithashtu se njëri prej bizneseve ushtronte veprimtari pa qenë i regjistruar në Agjencinë për Regjistrimin e Bizneseve në Kosovë (ARBK). Për shkeljet e konstatuara, ndaj operatorëve ekonomikë u shqiptuan shtatë gjoba, përveç mbylljes së bizneseve.
IQMT-ja tha se kontrollet inspektuese do të vazhdojnë në të gjithë territorin e Kosovës, me synim zbatimin e ligjit, formalizimin e veprimtarisë ekonomike dhe mbrojtjen e konsumatorëve. Institucioni u bëri thirrje operatorëve ekonomikë të përmbushin kushtet minimale teknike dhe të ushtrojnë veprimtarinë në përputhje me legjislacionin në fuqi.