Inspektorati Qendror i Mbikëqyrjes së Tregut (IQMT), në bashkëpunim me Administratën Tatimore të Kosovës (ATK), ka vazhduar zbatimin e planit operacional të inspektimeve ndaj subjekteve që ushtrojnë veprimtari në fushën e kriptovalutave dhe këmbimoreve në të gjithë territorin e Republikës së Kosovës.
Gjatë aksionit të fundit, autoritetet kanë realizuar gjithsej 14 inspektime. Si rezultat i kontrolleve, janë mbyllur 2 biznese për shkak të mungesës së dokumentacionit të nevojshëm për ushtrimin e veprimtarisë ekonomike, ndërsa 2 biznese të tjera janë gjobitur për mosrespektim të orarit të punës.
IQMT ka rikujtuar se të gjitha bizneset që operojnë në këtë sektor janë të obliguara të përmbushin kriteret ligjore. Kjo përfshin sigurimin e pëlqimit për kushtet minimale teknike nga Ministria e Industrisë, Ndërmarrësisë dhe Tregtisë (MINT), si dhe licencën përkatëse nga Banka Qendrore e Republikës së Kosovës (BQK), sipas legjislacionit në fuqi.
Ky aksion vijon pas operacionit të një dite më parë, ku u mbyllën 6 biznese të tjera në të njëjtin sektor. Inspektorati ka theksuar se do të vazhdojë mbikëqyrjen e tregut për të garantuar një mjedis të rregullt, transparent dhe të sigurt.