Inspektorati Qendror i Punës ka ndaluar përkohësisht punimet në nëntë objekte ndërtimi: tetë në Rajonin e Prishtinës dhe një në Ferizaj. Vendimi u mor pas evidentimit të parregullsive në zbatimin e masave për siguri dhe shëndet në punë.
Sipas njoftimit të institucionit, parregullsitë u konstatuan gjatë kontrolleve dhe inspektimeve në terren. Punimet do të mbeten të ndaluara deri në eliminimin e tyre dhe krijimin e kushteve të sigurta për punëtorët.
Inspektorati Qendror i Punës u ka bërë thirrje punëdhënësve të respektojnë kërkesat ligjore për sigurinë dhe shëndetin në vendin e punës. Sipas institucionit, respektimi i këtyre masave synon parandalimin e aksidenteve dhe mbrojtjen e jetës e shëndetit të punëtorëve.