Inspektorati vijon kontrollet për produktet me yndyrë bimore

Inspektorati Qendror i Mbikëqyrjes së Tregut (IQMT), në bashkëpunim me Agjencinë e Ushqimit dhe Veterinarisë (AUV), ka intensifikuar kontrollet në tregjet e Republikës së Kosovës. Pas urdhrit për largimin e produkteve të qumështit që përmbajnë yndyrë me bazë bimore, inspektorët kanë kryer kontrolle në markete të klasit B dhe C në rajonet e Prishtinës dhe Prizrenit.

Gjatë këtyre inspektimeve, inspektorët kanë evidentuar dhe larguar nga raftet e shitjes produktet si: Holla Schmand (400 gram), Holla Cooking Cream (1 litër) dhe Magic Krem (800 gram). Ministria e Industrisë, Ndërmarrësisë, Tregtisë dhe Inovacionit (MINT) bëri të ditur se kontrollet do të vazhdojnë në ditët në vijim, duke u bazuar në një listë të zgjeruar të produkteve të identifikuara nga AUV-i dhe të publikuara nga Ministria e Bujqësisë, Pylltarisë dhe Zhvillimit Rural.

Lista e produkteve të kompanisë Abrazen LLC – Qumështorja Vita

Në listën e produkteve që duhet të tërhiqen menjëherë nga tregu përfshihen:
• Schmand (18%): 180 g, 400 g dhe 800 g
• Holla Dessert: 1L
• Holla Barista (3.8%): 1L
• Graden Milk: 1L
• Holla Cooking Cream: 1L
• Mushroom Cream Cheese: 200 g
• Qumësht “My Cow” (3.2%): 1L
• Qumësht UHT “My Cow” (3.2%): 1L
• Qumësht UHT “Land” (3.2%)
• Djathë i bardhë 100%: 250 g

Institucionet shtetërore u kanë bërë thirrje të gjitha kompanive prodhuese të tërheqin produktet me yndyrë bimore për të garantuar mbrojtjen e shëndetit të qytetarëve. Konsumatorët janë njoftuar se mund të raportojnë rastet në platformën Viber në numrin +383 (0) 46 311-000. MINT është zotuar se do ta njoftojë opinionin publik në baza ditore për produktet e hequra, me qëllim garantimin e transparencës dhe mbrojtjen e konsumatorëve nga mashtrimi.