Nënkryetari i Partisë Demokratike, Belind Këlliçi, bëri të ditur se Internacionalja Demokrate e Qendrës (CDI), organizata më e madhe ndërkombëtare e qendrës së djathtë, ka miratuar një deklaratë zyrtare mbi situatën politike në Shqipëri. Vendimi u mor gjatë punimeve të Asamblesë së Përgjithshme në Bruksel, e cila përfaqëson 115 parti nga 83 shtete.
Sipas njoftimit të Partisë Demokratike, delegacioni shqiptar i kryesuar nga Sali Berisha ka paraqitur para anëtarëve të asamblesë zhvillimet e fundit në vend. Këlliçi theksoi se është kërkuar ngritja e një grupi pune për të shqyrtuar lidhjet e qeverisë me krimin e organizuar, si dhe është propozuar zhvillimi i një konference ndërkombëtare për këtë çështje.
Në deklaratën e miratuar, CDI shpreh shqetësimin e thellë për përkeqësimin e shtetit të së drejtës dhe institucioneve demokratike në vend, duke iu referuar raporteve ndërkombëtare. Organizata solidarizohet me opozitën dhe qytetarët që po protestojnë, duke cilësuar lirinë e shprehjes dhe të drejtën për protestë si vlera themelore.
Në përmbyllje, CDI u bëri thirrje autoriteteve shqiptare për:
• Angazhim në një dialog të mirëfilltë demokratik.
• Zbatimin e plotë të rekomandimeve ndërkombëtare për reformën zgjedhore.
• Garantimin e kushteve të barabarta për konkurrencën politike.
• Ndalimin e çdo forme presioni ndaj protestuesve, gazetarëve dhe përfaqësuesve të shoqërisë civile.