Zëvendëskryeministrja Albana Koçiu dhe Ministri i Mbrojtjes Ermal Nufi zhvilluan një vizitë inspektuese në ambientet e kompanisë Guna Tactical, pjesë e KAYO-s, ku po ndërtohet një fabrikë e specializuar për prodhimin e uniformave dhe pajisjeve ushtarake. Ky investim, i realizuar në kuadër të marrëveshjes me MSSC Group, përfaqëson një hap strategjik për industrinë shqiptare të mbrojtjes.
Sipas autoriteteve, ky projekt pritet të gjenerojë rreth 1200 vende të reja pune dhe të integrojë industrinë vendase në zinxhirët ndërkombëtarë të furnizimit. Prodhimet e këtij kompleksi do të shërbejnë për nevojat e Forcave të Armatosura, Polisisë së Shtetit, Drejtorisë së Përgjithshme të Burgjeve, si dhe për partnerë të vendeve anëtare të NATO-s.
Në kuadër të përgatitjeve për Samitin e NATO-s që do të zhvillohet në Shqipëri në vitin 2027, qeveria ka rritur mbështetjen financiare për sektorin. Përmes Aktit Normativ të Buxhetit 2026, janë miratuar 10.3 miliardë lekë shtesë, duke e çuar nivelin e financimit në 2.6% të PBB-së.
Znj. Koçiu theksoi se tradita në manifakturë dhe fuqia punëtore e kualifikuar po e shndërrojnë vendin në një partner konkurrues. Ndërkohë, ministri Nufi shtoi se, së bashku me nisma të tjera si TIMAK Defence dhe Myslym Keta Defence, po krijohet një zinxhir i integruar i industrisë së mbrojtjes, duke e bërë Shqipërinë një pikë referimi në këtë sektor.