Një zjarr ka përfshirë fasadën e pallatit Arlis, ku dëmet do të ishin më të pakta nëse materiali përdorur do të plotësonte standardet e sigurisë.
Inxhinierët e ndërtimit vërejnë se ndërtuesit, për të ulur kostot dhe rritur fitimet, nuk respektojnë gjithmonë kushtet urbanistike dhe elementët mbrojtës. "Ndërtuesit shpesh orientohen drejt materialeve të lira, edhe kur ato nuk përmbushin standardet dhe kriteret e mbrojtjes nga zjarri", shprehet eksperti për mbrojtjen nga zjarri Mariglen Sakolli.
Luljeta Bozo, inxhinierja e ndërtimit, thekson se ndërtimi ka rregulla strikte që askush nuk duhet t'i shkelë, pasi rrezikojnë jetën e njerëzve. "Nuk është normale që fasada të marrë flakë, sepse ai material është vënë me qëllim të mirë për termoizolim, por nuk plotëson kushtet për të qenë i padjegshëm. Ka materiale të tilla më të kushtueshme, por në fund nuk llogarisim lekë, por kemi jetë", shton ajo.
Përgjegjësia nuk bie vetëm te ndërtuesit, por te i gjithë sistemi kontrollues, i cili ka dështuar. "Asnjë material për ndërtim nuk duhet të vijë pa certifikatën e cilësisë dhe këtu në Shqipëri çalon shumë hallka e kontrollit", deklaron Bozo.
Flakët nuk kanë prekur strukturën e ndërtesës. "Kapota nuk është strukturë dhe apartamentet nuk janë dëmtuar. Kolonat janë të paprekura", sqaron ajo. Banorët mund të kthehen në apartamentet e tyre.
Ngjarje të tilla përsëriten dhe shërbejnë si kambanë alarmi për sigurinë e banorëve dhe investimet e tyre në apartamente e biznese.