Organizata Ndërkombëtare për Migracionin (IOM) njoftoi se më shumë se 800.000 njerëz, ose gati 1 milion, janë zhvendosur në Liban për shkak të përshkallëzimit të armiqësive dhe urdhrave të evakuimit të lëshuar nga Izraeli.
Drejtoresha e Përgjithshme e IOM-it, Amy Pope, u shpreh "thellë e alarmuar" nga raportet për një sulm që goditi të zhvendosurit e strehuar në kryeqytetin libanez, Bejrut. Sulmi vrau të paktën 8 persona dhe plagosi dhjetëra të tjerë.
"Civilët dhe objektet civile nuk duhet të jenë kurrë në shënjestër të qëllimshme; vendet e tyre të strehimit dhe infrastruktura përkatëse nuk duhet të jenë kurrë shënjestër e armiqësive ushtarake", theksoi ajo.
Rreth 125.000 persona qëndrojnë në strehimore kolektive të drejtuara nga qeveria libaneze. Shumë të tjerë strehohen tek të afërm, miq ose komunitete lokale. Mijëra familje mbeten pa strehim të përshtatshëm, duke fjetur në rrugë ose në tenda e strehimore të improvizuara në Bejrut.
Shumë të zhvendosur mbërritën në kryeqytet vetëm me rrobat në trup dhe jetojnë në kushte që ofrojnë pak mbrojtje nga bombardimet. Amy Pope paralajmëroi për nevojën e ndihmës urgjente për të parandaluar një krizë më të thellë humanitare.
"E Drejta Ndërkombëtare Humanitare kërkon që palët të lejojnë dhe lehtësojnë ndihmën humanitare të shpejtë për civilët në nevojë. Kjo duhet të respektohet tani", tha ajo.
Sipas disa burimeve, tensionet u përshkallëzuan më 2 mars, kur grupi i rezistencës libaneze Hezbollah sulmoi baza ushtarake izraelite në përgjigje ndaj sulmeve izraelite ndaj Libanit dhe vrasjes së udhëheqësit të atëhershëm suprem të Iranit Ali Khamenei në një sulm amerikano-izraelit.