Inspektorati Policor i Kosovës (IPK) arrestoi një zyrtar policor në Pejë të dyshuar për kryerjen e veprës penale dhunë në familje. Ngjarja ndodhi jashtë orarit të punës së tij zyrtare. IPK-ja pranoi informacione mbrëmjen e së dielës lidhur me dyshimin se zyrtari kishte ushtruar dhunë ndaj bashkëshortes së tij.
Menjëherë pas pranimit të informacionit, hetuesit e Departamentit të Hetimeve të IPK-së iu përgjigjën thirrjes në vendngjarje dhe intervistuan viktimën, bashkëshorten e të dyshuarit. Pas veprimeve fillestare hetimore, rasti u konsultua me prokurorin kompetent, i cili vendosi masën e ndalimit për 48 orë ndaj zyrtarit policor.
Në kuadër të procedurave administrative dhe hetimore, zyrtari policor u suspendua nga detyra. Hetuesit e IPK-së, në koordinim të plotë me prokurorinë, do të vazhdojnë veprimet hetimore për të zbardhur plotësisht rrethanat e rastit.