Irani akuzoi Bashkimin Europian për bashkëfajësi në luftën që, sipas Teheranit, po zhvillojnë Shtetet e Bashkuara dhe Izraeli kundër tij. Deklarata u bë të enjten nga zëdhënësi i Ministrisë së Jashtme iraniane, Esmail Baghaei.
Ai shkroi në rrjetin social X se "indiferenca dhe toleranca e Bashkimit Europian ndaj agresionit, dhunës dhe mizorive të SHBA-së dhe Izraelit nuk është asgjë më pak se bashkëfajësi. Bota po e shikon këtë". Për të mbështetur pretendimin, Baghaei shpërndau një video të eurodeputetit belg të majtë Marc Botenga, i cili në një fjalim në Parlamentin Europian në Strasbourg tha se shumë politikanë europianë nuk e dënojnë, por mbështesin luftën kundër Iranit.
Bëhet e ditur se brenda Bashkimit Europian janë shfaqur qëndrime të ndryshme për konfliktin në Lindjen e Mesme. Presidentja e Komisionit Europian, Ursula von der Leyen, u shpreh se "nuk duhet derdhur lot për rënien e regjimit iranian".
Nga ana tjetër, presidenti i Këshillit Europian, Antonio Costa, paralajmëroi se goditjet e urdhëruara nga presidenti amerikan Donald Trump dhe kryeministri izraelit Benjamin Netanyahu mund të shkaktojnë destabilizim të mëtejshëm në rajon.
Spanja ka kritikuar më ashpër veprimet ushtarake, duke u dalluar nga qëndrimet e Gjermanisë, Francës dhe Mbretërisë së Bashkuar.
Deklaratat e Baghaei-t erdhën pak orë pasi kryetari i parlamentit iranian, Mohammad Bagher Ghalibaf, paralajmëroi se çdo sulm ndaj ishujve iranianë do të "thyejë çdo vetëpërmbajtje" nga ana e Teheranit.
Përditësime
Mohammad Bagher Ghalibaf, kryetar i Parlamentit Iranian, deklaroi se «Gjaku i ushtarëve amerikanë është përgjegjësi personale e Trumpit».