Ebrahim Jabbari, këshilltar i komandantit të përgjithshëm të Gardës Revolucionare Islamike (IRGC), paralajmëroi anijet që përpiqen të kalojnë nëpër Ngushticën e Hormuzit.
Duke folur në televizionin shtetëror, ai deklaroi se Irani do t'ia vërë flakën kujtdo që mundohet të kalojë ngushticën.
Jabbari konfirmoi se ngushtica është e mbyllur dhe u drejtoi anijeve një paralajmërim të qartë: "Ata nuk duhet të vijnë në këtë rajon. Ata me siguri do të përballen me një përgjigje serioze nga ne".
Ai shtoi se amerikanët janë "të etur për naftën e rajonit" dhe se Irani do t'i godasë tubacionet e tyre në zonë, duke mos lejuar eksportin e naftës nga kjo trevë.
Ngushtica e Hormuzit është një nga rrugët më të rëndësishme detare në botë dhe pika kryesore e tranzitit të naftës. Rreth një e pesta e naftës dhe gazit në botë kalon përmes saj.