Ministria e Jashtme e Iranit ka reaguar ndaj akuzave të kryeministrit të Shqipërisë, Edi Rama, për përfshirje në një fushatë dezinformimi lidhur me projektin urbanistik në Zvërnec. Gjatë Samitit BE–Ballkani Perëndimor në Tivat të Malit të Zi, Rama theksoi se regjimi iranian është pjesë e përpjekjeve për të përhapur narrativën se ky projekt synon strehimin e palestinezëve nga Gaza në Shqipëri.
Zëdhënësi i Ministrisë së Jashtme iraniane, Esmail Baghaei, i ka hedhur poshtë këto pretendime, duke i ironizuar ato. "Irani? Ndoshta do të thonë se edhe flamingot ishin agjentë sekretë iranianë", deklaroi Baghaei. Ai e cilësoi qëndrimin e qeverisë shqiptare si një narrativë të përsëritur që synon afrimin më të madh me Izraelin.
Sipas përfaqësuesit iranian, këto akuza shërbejnë si një mekanizëm për të shmangur debatin e brendshëm politik dhe për t'iu shmangur llogaridhënies para popullit shqiptar sa i përket vendimeve qeveritare. Baghaei shtoi se etiketime të tilla ndaj shtetit të tij bëhen për të kënaqur aleatët ndërkombëtarë, duke theksuar se populli shqiptar është i ndërgjegjshëm për motivet e vërteta të këtyre deklaratave.