Kryetari i Grupit Parlamentar të Partisë Demokratike, Gazment Bardhi, i është drejtuar me një mesazh të ashpër kryeministrit Edi Rama, duke e akuzuar atë për përfshirjen e Iranit në debatin politik shqiptar. Sipas Bardhit, ky zhvillim është pasojë e një strategjie të qeverisë për të përballuar protestat që kundërshtojnë investimin në zonën e Zvërnecit.
Reagimi i Bardhit pason replikat në distancë midis kryeministrit Rama dhe zëdhënësit të Ministrisë së Jashtme të Iranit, Esmaeil Baghaei, lidhur me pretendimet për ndikimin iranian në çështjet e brendshme të Shqipërisë. Në qëndrimin e tij, kryetari i grupit parlamentar të opozitës shprehet se Rama është i gatshëm të "flirtojë" me aktorë të huaj për të qëndruar në pushtet.
"Iranin në këtë debat e fute ti. Ti akuzove protestuesit dhe shpike komplotin me iranianë", shkruan Bardhi. Ai vlerësoi se qasja e kryeministrit ndaj kundërshtarëve politikë është e ngjashme me regjimin e ajatollahëve, duke shtuar se për Ramën, kushdo që nuk pajtohet me politikat qeveritare shpallet armik.
Sipas Bardhit, kryeministri ka etiketuar si armiq protestuesit, opozitarët, fqinjët, europianët dhe influencerët, duke përfunduar se për të, e vetmja zgjidhje është largimi i tij nga qeverisja.