Marina e Gardës Revolucionare Islamike të Iranit ka sekuestruar anijen MSC Francesca, e cila lundron nën flamurin e Panamasë, në Ngushticën e Hormuzit. Ky veprim ndodhi të mërkurën dhe përfshin edhe anijen greke Epaminondas.
Ministri i Detarisë i Malit të Zi, Filip Radulloviq, deklaroi se detarët malazezë në bord, duke përfshirë kapitenin malazez, janë në gjendje të mirë dhe stabile. Ai u shpreh për Radio Televizionin e Malit të Zi se përfaqësuesit e ministrisë janë në kontakt të drejtpërdrejtë me kapitenin dhe se negociatat mes kompanisë MSC dhe autoriteteve iraniane po zhvillohen mirë.
Anija është e ankoruar nëntë milje detare larg bregdetit iranian. Radulloviq theksoi se Ministria e Punëve të Jashtme e Malit të Zi është e njoftuar dhe se familjarëve të detarëve u është premtuar se shteti do të bëjë çdo përpjekje për kthimin e tyre në shtëpi.
Ministria e Punëve të Jashtme e Panamasë njoftuan se anija MSC Francesca u zhvendos me forcë në ujërat territoriale iraniane. Panamaja e akuzoi Iranin për shkelje të së drejtës ndërkombëtare, duke e cilësuar veprimin si sulm serioz ndaj sigurisë detare dhe përshkallëzim të panevojshëm të tensioneve.
Sipas njoftimit të Gardës Revolucionare Islamike, anijet u ndaluan për tentativë largimi fshehurazi nga Ngushtica pa autorizim, shkelje të shumta rregullash dhe manipulim të sistemeve të ndihmës në navigim, që rrezikojnë sigurinë detare. Anijet u transferuan në ujërat iraniane për inspektim të ngarkesës dhe dokumenteve.