Rrjetet e trafikimit të qenieve njerëzore po shfrytëzojnë rrjetet sociale, veçanërisht platformën TikTok, për të reklamuar rrugë të paligjshme hyrjeje në Mbretërinë e Bashkuar përmes Republikës së Irlandës. Sipas një investigimi të gazetës britanike The Telegraph, trafikantët shfrytëzojnë mungesën e kontrolleve të pasaportave në kufirin midis Republikës së Irlandës dhe Irlandës së Veriut.
Skema përfshin udhëtime ajrore drejt Dublinit dhe më pas kalimin tokësor drejt Britanisë, shërbim ky që ofrohet kundrejt pagesave që arrijnë deri në 7 mijë paund. Të dhënat zyrtare tregojnë se gjatë vitit të fundit janë arrestuar mbi 900 emigrantë, përfshirë shtetas shqiptarë, rumunë dhe afganë, të cilët dyshohet se kanë ndjekur këtë itinerar.
Çështja ka tërhequr vëmendjen e autoriteteve pas një incidenti me thikë në Belfast, ku një shtetas sudanez, i identifikuar si Hadi Alodid, u akuzua për tentativë vrasjeje ndaj një 44-vjeçari. Autoritetet dyshojnë se i pandehuri kishte udhëtuar nga Franca drejt Dublinit përpara se të mbërrinte në Belfast.
Ngjarja ka shkaktuar tensione sociale në Irlandën e Veriut, ku janë regjistruar protesta dhe sulme ndaj banesave, automjeteve dhe bizneseve të emigrantëve, duke detyruar policinë të evakuojë familje për motive sigurie. Si përgjigje, Ministria e Brendshme britanike ka njoftuar intensifikimin e operacioneve dhe kontrolleve për të mbyllur boshllëqet ligjore në kufi. Gjithashtu, po vlerësohen masa për të detyruar platformat sociale që të heqin përmbajtjet që promovojnë trafikimin ose nxisin trazira publike.