Robert Bosch, ish-ambasadori i Holandës në Kosovë, në një lidhje direkte me emisionin "Rreth e qark" të A2CNN, tha se nuk ka qenë personalisht dakord me krijimin e Gjykatës Speciale.
Sipas tij, kjo gjykatë u krijua me mbështetjen e shërbimeve sekrete serbe dhe u bazua në raportin e Dick Marty. "Kur isha ambasador, duhej ta mbështesja Gjykatën Speciale sepse ashtu më thoshte qeveria ime, por personalisht nuk e mbështesja sepse ishte e bazuar te raporti i Dick Marty, që ishte me mbështetjen e shërbimeve sekrete serbe, dhe Marty vendosi ta vinte në përdorim dosjen", deklaroi Bosch.
I gjithë procesi ishte i bazuar në akuza për trafikim organesh në të ashtuquajturën shtëpi e verdhë në veri të Shqipërisë. Bosch nuk ishte dakord, pasi EULEX-i dhe UNMIK-u kishin hetuar dhe kishin arritur në përfundimin se akuzat nuk kishin vlerë. Megjithatë, Këshilli i Europës kishte bërë presion për hetim të mëtejshëm.
Ai vlerësoi se nuk kishte asgjë të keqe në hetim, por procesi duhej të ndalej pasi gjykatësi Williamson kishte vërejtur se ngjarja nuk ishte e vërtetë. "Nuk ka gjë të keqe sepse heton, por ajo që nuk shkon ishte se kur gjykatësi Williamson vërejti se kjo ngjarje nuk ishte e vërtetë, duhet të ishte ndalur si proces", shtoi ai.
Bosch mohoi pretendimin se UÇK-ja ishte organizatë kriminale, duke thënë se ajo nuk ishte e organizuar. Ai përmendi edhe zotin Hill, të cilin e quajti pro-serb, që kishte thënë se UÇK-ja nuk ishte e organizuar.