Ish-futbollisti i njohur, Dani Osvaldo, i cili ka luajtur për skuadra si Juventus, Southampton dhe Kombëtaren e Italisë, është shtruar me urgjencë në spital në Argjentinë pas përkeqësimit të gjendjes së tij shëndetësore. 40-vjeçari, i cili është tërhequr nga futbolli, kishte vuajtur nga dhimbje të forta në gjoks për disa ditë përpara se të kërkonte ndihmë mjekësore.
Pas transportimit në Spitalin Komunal Llavallol në Lomas de Zamora, stafi mjekësor diagnostikoi një derdhje pleurale në anën e djathtë. Komplikacionet e shkaktuara nga grumbullimi i lëngjeve dhe qelbit në mushkëri detyruan kirurgët të ndërhynin për drenimin e zonës së infektuar. Sipas raportimeve, motra dhe një mik i ish-futbollistit e ndihmuan atë që të dërgohej në strukturën mjekësore.
Gazetari Pepe Ochoa, në emisionin argjentinas “LAM” të moderuar nga Angel de Brito, bëri të ditur se ndërhyrja kirurgjikale përfshiu heqjen e një pjese të indit mushkëror. Pas operacionit, Osvaldo është vendosur në repartin e terapisë intensive, ku mbetet nën monitorim të vazhdueshëm. Familjarët e tij kanë kërkuar privatësi maksimale, duke shmangur publikimin e buletineve mjekësore zyrtare. Përveç emergjencës shëndetësore, raportimet mediatike tregojnë se ish-sulmuesi i Boca Juniors po përballej me vështirësi të rënda personale dhe financiare përpara shtrimit në spital.