Jinchao Wei, i njohur edhe si Patrick, një ish-marinari 25-vjeçar në Marinën e Shteteve të Bashkuara, u dënua me 17 vjet burg (precizisht 16 vjet e 8 muaj) për spiunazh në favor të Kinës. Dënimi u shqiptua nga një gjykatë federale dhe u njoftua nga Departamenti i Drejtësisë i SHBA-së më 13 janar 2026.
Wei u arrestua në gusht të vitit 2023 në Bazën Detare të San Diegos, pikërisht kur ishte gati të merrte detyrën në anijen sulmuese amfibe USS Essex, një element kyç i Flotës së Paqësorit të SHBA-së. Në gusht të vitit 2025, një juri e madhe federale e shpalli atë fajtor për gjashtë akuza të rënda: konspiracion për të kryer spiunazh, spiunazh, eksportim të paligjshëm, konspiracion për të eksportuar të dhëna teknike në lidhje me artikujt e mbrojtjes, shkelje të Aktit të Kontrollit të Eksportit të Armëve dhe Rregulloreve Ndërkombëtare të Tregtisë së Armëve.
Sipas dëshmive në gjyq, Wei i kishte shitur informacione të ndjeshme të mbrojtjes kombëtare një oficeri të inteligjencës kineze për 12,000 dollarë. Këto të dhëna përfshinin manuale teknike dhe operacionale, fotografi dhe video të anijes USS Essex, si dhe detaje mbi sistemet e armëve, sistemet e shtytjes, kontrollin e dëmeve dhe aftësitë operacionale të anijeve të Marinës Amerikane.
Rekrutimi i Weis ndodhi më 14 shkurt 2022, përmes mediave sociale, ku oficeri kinez fillimisht u prezantua si një entuziast i marinës që punonte për Korporatën Shtetërore të Industrisë së Ndërtimit të Anijeve të Kinës. Gjatë zhvillimit të marrëdhënies, Wei e quajti atë “Vëllai i Madh Andy” dhe ra dakord të mbante sekrete kontaktet duke përdorur aplikacione të koduara, duke fshirë mesazhe dhe llogari, si dhe duke shfrytëzuar “dead drops” dixhitale që zhdukeshin automatikisht.
Roman Rozhavsky, zëvendësdrejtor i Drejtorisë së Kundërzbulimit dhe Inteligjencës së FBI-së, deklaroi se “Wei tradhtoi besimin që i ishte dhënë si anëtar i Marinës Amerikane duke i transmetuar me vetëdije informacione të ndjeshme ushtarake një oficeri kinez të inteligjencës”. Kjo ngjarje nxjerr në pah rreziqet e infiltrimit të huaj në strukturat ushtarake të SHBA-së.