Eileen Wang, ish-kryebashkiakja e qytetit Arcadia në SHBA, dha dorëheqjen pasi Departamenti Amerikan i Drejtësisë e akuzoi për veprim ilegal në interes të qeverisë kineze.
Sipas autoriteteve amerikane, Wang pranoi të shpallet fajtore për një akuzë penale që lidhet me bashkëpunimin e fshehtë me zyrtarë kinezë. Ajo rrezikon deri në 10 vite burgim.
Prokurorët deklaruan se Wang mori udhëzime direkte nga përfaqësues të qeverisë kineze dhe shpërndau materiale propagandistike pro-Pekinit pa i deklaruar këto aktivitete tek autoritetet amerikane, siç kërkon ligji. Hetimet zbuluan se ajo publikonte artikuj në favor të Kinës nëpërmjet platformës mediatike US News Center, e cila prezantohej si faqe informative për komunitetin kinezo-amerikan në Arcadia.
Një rast i përmendur nga Departamenti i Drejtësisë përfshinte shpërndarjen e një artikulli që mohonte akuzat për punë të detyruar dhe abuzime ndaj ujgurëve në rajonin kinez të Xinjiangut. Sipas hetuesve, artikulli i ishte dërguar Wang-ut përmes aplikacionit WeChat nga një zyrtar kinez dhe ajo e publikoi menjëherë në platformën që administronte.
Avokatët e saj thanë në një deklaratë se Wang "kërkon ndjesë dhe shpreh keqardhje për gabimet e bëra në jetën personale", duke shtuar se përkushtimi i saj ndaj komunitetit të Arcadias nuk ka ndryshuar.
Autoritetet amerikane e cilësuan rastin si sukses në luftën kundër ndikimit të huaj në institucionet amerikane. Zyrtarët e Departamentit të Drejtësisë theksuan se individët që veprojnë fshehurazi për llogari të qeverive të huaja cenojnë demokracinë dhe sigurinë kombëtare të SHBA-ve.
Menaxheri i qytetit të Arcadias deklaroi se akuzat janë serioze dhe shqetësuese, por hetimet nuk kanë zbuluar përfshirje të financave apo proceseve zyrtare të bashkisë në këtë çështje. Aktivitetet për të cilat akuzohet Wang kishin ndodhur para se ajo të bëhej kryebashkiake.