Gjykata Themelore në Prishtinë shpalli aktgjykimin dënues ndaj ish-ministrit Endrit Shala, duke e shpallur atë fajtor për veprën penale të konfliktit të interesit. Trupi gjykues i udhëhequr nga kryetarja Violeta Namani-Hajra, së bashku me anëtarët Medie Bytyqi dhe Kujtim Krasniqi, vlerësoi se në këtë rast nuk ishin përmbushur elementet e veprës së keqpërdorimit të detyrës zyrtare.
Sipas vendimit, Endrit Shala u dënua bazuar në nenin 417 të Kodit Penal. Përveç dënimit me burgim, i akuzuari është ngarkuar me pagesën e 100 eurove për paushallin gjyqësor dhe 100 eurove shtesë për Fondin për Kompensimin e Viktimave të Krimit. Dënimi do të bëhet i ekzekutueshëm pasi vendimi të marrë formën e prerë, ndërsa palët kanë të drejtë ankese brenda afatit prej 30 ditësh.
Çështja ndaj Shalës u procedua e veçuar nga ajo ndaj ish-ministrit tjetër, Vesel Krasniqi, pas dështimit të seancës së 1 dhjetorit 2025 për shkak të mungesës së Shalës. Avokati Artan Qerkini, mbrojtës i Krasniqit, kishte kërkuar veçimin e procedurës për të përshpejtuar gjykimin. Të dy ish-ministrat ishin deklaruar të pafajshëm gjatë seancës fillestare të mbajtur më 27 nëntor 2024, pas ngritjes së aktakuzës nga Prokuroria Speciale e Republikës së Kosovës më 30 gusht 2024.