Gjykata Themelore në Prishtinë ka publikuar aktgjykimin e arsyetuar për dënimin e ish-ministrit të Industrisë dhe Tregtisë, Endrit Shala, i cili është dënuar me 2 vite burgim për veprën penale të konfliktit të interesit. Ky dënim erdhi pas rikualifikimit të veprës nga "Keqpërdorimi i pozitës apo autoritetit zyrtar" në "Konflikt interesi".
Sipas vendimit të publikuar më 31 korrik 2026, gjykata konstatoi se më 30 maj 2019, Endrit Shala kishte nënshkruar dhe miratuar një vendim me të cilin operatori ekonomik N. Sh. "E. I." (i njohur edhe si "Euro Inspekt") u caktua si trup inspektues për vlerësimin e karburanteve të naftës në Kosovë. Gjykata vlerësoi se ish-ministri ka vepruar me dashje dhe dijeni, duke mos deklaruar konfliktin e interesit pavarësisht lidhjes familjare të krushqisë me pronarin e këtij biznesi, i cili është baxhanaku i tij.
Në arsyetimin e saj, Gjykata theksoi se Endrit Shala kishte për detyrë ligjore të përjashtohej nga vendimmarrja dhe të njoftonte organet kompetente. Pretendimet e të akuzuarit se ishte mbështetur në opinione të mëhershme të Agjencisë Kundër Korrupsionit dhe në udhëzime nga Departamenti Ligjor i Ministrisë nuk u pranuan si shfajësuese, pasi gjykata vlerësoi se ai ishte plotësisht në dijeni për interesin financiar që do të përfitonte operatori në fjalë. Prokuroria Speciale ka bërë të ditur se biznesi në fjalë përfitoi rreth 732 mijë euro përmes këtij procesi.
Në të njëjtën aktakuzë fillestare ishte përfshirë edhe ish-ministri Vesel Krasniqi, aktualisht nënkryetar i Komunës së Malishevës, por procedura ndaj tij është veçuar për të mundësuar një zhvillim më efikas të gjykimit. Në kohën kur shërbenin në Qeverinë e Kosovës, si Endrit Shala ashtu edhe Vesel Krasniqi ishin pjesë e subjektit politik Nisma.
Përditësime
Hetimi i mëtejshëm identifikoi biznesin përfitues si kompaninë 'Euro Inspekt'. Ky subjekt ushtron veprimtari në fushën e vlerësimit të konformitetit të karburanteve të naftës në tregun e Kosovës.