Ish-ministri i Mbrojtjes, Gazmend Oketa, ka dhënë dëshminë e tij para trupës gjykuese në Gjykatën e Posaçme kundër Korrupsionit dhe Krimit të Organizuar (GJKKO), në kuadër të procesit gjyqësor për ish-klubin sportiv Partizani.
I thirrur si dëshmitar nga Prokuroria e Posaçme (SPAK), Oketa sqaroi raportin e institucionit që drejtonte me pronën në fjalë. Sipas dëshmisë së tij, klubi nuk kishte asnjë lidhje funksionale me Ministrinë e Mbrojtjes dhe administrohej nga persona privatë. Ai deklaroi se nuk mban mend që kjo çështje të jetë diskutuar si një prioritet në mbledhjet e ministrisë.
"Kam qenë ministër i Mbrojtjes dhe jo ministër sporti. Nuk kishte vend të veçantë për ne, sepse prona nuk ishte e Ministrisë së Mbrojtjes. Klubi Partizani, në kujtesën time, ka qenë një klub privat. Unë as e kam konsideruar fare," u shpreh Oketa. Ai shpjegoi se prona iu paraqit në tavolinën e tij si një praktikë administrativisht e plotë, ku pronarët kishin kryer pagesat e nevojshme sipas ligjit.
Lidhur me inventarin e pronave, ish-ministri pranoi se nuk i kujtohet emri i saktë i drejtorisë përgjegjëse, por theksoi se bëhej fjalë për një strukturë që ekziston ende. Ai shtoi se për shkak të ngarkesës së madhe dhe numrit të madh të personelit në ministri, kompetencat ishin deleguar sipas procedurave ligjore në fuqi. Gjithashtu, Oketa nënvizoi se edhe në atë periudhë, ministria nuk dispononte një inventar të plotë dhe të azhurnuar të të gjitha pronave nën administrim.