Ish-zëvendëskryeministri dhe ish-ministri i Mbrojtjes, Gazmend Oketa, është paraqitur këtë të hënë në Gjykatën e Posaçme kundër Korrupsionit dhe Krimit të Organizuar (GJKKO). Ai është thirrur nga Prokuroria e Posaçme (SPAK) për të dëshmuar në procesin gjyqësor që po zhvillohet lidhur me privatizimin e ish-kompleksit sportiv “Partizani”.
Sipas akuzave të parashtruara më herët nga SPAK, Gazmend Oketa, në kohën kur mbante detyrën e ministrit, ka nënshkruar një auditim që dyshohet se shërbeu si presion ndaj komandës mbështetëse, e cila kishte refuzuar më herët dhënien e ambienteve për klubin e futbollit “Partizani”. Megjithatë, sipas burimeve, ndonëse prokuroria ka konstatuar këtë fakt, pozita e ish-funksionarit nuk rezulton të jetë në vështirësi brenda fashikullit të hetimeve.
Gazmend Oketa ka shërbyer si ministër i Mbrojtjes gjatë qeverisjes së ish-kryeministrit Sali Berisha. Dëshmia e tij para togave të zeza synon të sqarojë rrethanat e procesit të privatizimit në fjalë.