Gjykata e Posaçme Antikorrupsion ka shtyrë seancën për aferën “Partizani”. Seanca e radhës u caktua për 8 qershor pas kërkesës së prokurorisë për mungesën e avokatit të biznesmenit Fatmir Bektashi.
Në seancën e sotme ishin thirrur për dëshmi ish-ministri i Sporteve Ylli Pango dhe drejtoresha e dikasterit në atë kohë Violeta Shqevi. Pango njoftoi se nuk mund të paraqitet më 8 qershor dhe gjykata vendosi të thërrasë edhe katër dëshmitarë të tjerë: Paro Laci, Genc Ruli, Tedis Lubonja dhe Altin Ceni.
Prokuroria e Posaçme synon të sqarojë rolin e Pangos dhe Shqevit në ndryshimet e ligjit për sportin të vitit 2008. Sipas dosjes, këto ndryshime lejuan privatizimin e plotë të pronave sportive dhe ndryshimin e destinacionit të tyre, duke mundësuar ndërtimin e kullave.
Të pandehur në proces janë ish-kryeministri Sali Berisha dhe dhëndri i tij Jamarbër Malltezi, i akuzuar edhe për pastrim parash. SPAK pretendon se privatizimi i ambientëve të ish-klubit Partizani u bë me qëllim që Malltezi të përfitonte nga ndërtimi i 19 kullave.