Donjeta Sahatçiu, ish-nënkryetare e Prishtinës nga radhët e Partisë Demokratike të Kosovës (PDK), ka shprehur kundërshtimin ndaj një koalicioni të mundshëm me Lidhjen Demokratike të Kosovës (LDK) në kryeqytet.
Ajo ka shkruar në rrjete sociale se nuk e mbështet një tillë bashkëpunim për shkak të 1001 arsyeve. “Kam kërkuar votë për atë që kam besuar, publikisht dhe pa kalkulime. Edhe pse do të gënjeja nëse them se nuk i kuptoj arsyetimet politike për një kompromis, nuk i kam pranuar kurrë si mënyrë për të ndërtuar besim me qytetarët, e aq më pak sot, pas një përvoje që dëshmoi të kundërtën. Pikëpamjet e mia janë krejtësisht të kundërta dhe kam 1001 arsye për to”, thuhet në deklaratën e saj.
Sahatçiu u shkarkua nga pozita e nënkryetares së Prishtinës në shkurt të vitit 2024. Kjo ndodhi pak orë pasi Lëvizja Vetëvendosje dhe PDK njoftuan se kanë thirrur seancë të jashtëzakonshme për të anuluar vendimin për këmbim të pronave. Kryetari i Prishtinës, Përparim Rama, mori këtë vendim menjëherë pas atij njoftimi.
Përditësime
Sahatçiu deklaroi se "nuk jam e përfshirë dhe nuk e mbështes" koalicionin LDK-PDK.
Ajo iu përgjigj telefonatave nga gazetarët dhe afirmoi se "kjo është hera e parë dhe e fundit" që prononcohet mbi çështjen, duke shtuar: "Edhe sikur të isha në Prishtinë".