Lidhja Demokratike e Kosovës ka reaguar me një komunikatë për media, duke mohuar çdo marrëveshje bashkëqeverisëse me Partinë Demokratike të Kosovës apo ndonjë subjekt tjetër politik në Prishtinë. Ky reagim erdhi pas deklaratës së Uran Ismailit, nënkryetar i PDK-së, i cili mbrëmë në emisionin "Pressing" në T7 konfirmoi arritjen e koalicionit me Përparim Ramën për qeverisjen e kryeqytetit.
Në komunikatë, LDK sqaron se nuk ka marrë pjesë në asnjë proces ndërpartiak për marrëveshje të tilla deri më tani. Partia nënvizon se ka strukturat e veta partiake dhe organet vendimmarrëse lokale, të cilat nuk kanë qenë të përfshira në ndonjë marrëveshje qeverisëse.
LDK shton se çdo marrëveshje tjetër nuk përfaqëson qëndrimin zyrtar të saj, nuk krijon obligime politike dhe nuk mund të konsiderohet si vullnet i organizuar. Palët politike e dinë se marrëveshjet me LDK-në ndërtohen përmes strukturave zyrtare, transparencës dhe vendimmarrjes institucionale. Çdo përpjekje për ta anashkaluar këtë rrugë nuk përbën marrëveshje me LDK-në.
Për çështjet lokale të tjera, LDK do të angazhohet pas zgjedhjeve nacionale, pasi anëtarësia është e fokusuar në procesin e ringritjes së përbashkët. Asnjë agjendë tjetër nuk mund ta zbehë këtë përkushtim.
Disa media përmendin tension mes Përparim Ramës, kryetar i Komunës së Prishtinës, dhe Lumir Abdixhikut, kryetar i LDK-së, si dhe shkarkimin e ish-drejtorit të Drejtorisë së Investimeve Kapitale, Sokol Havolli, i cili e lidh atë me afrimin e Ramës me PDK-në.