Ish-presidenti Alfred Moisiu ndodhet i shtruar prej 4 shkurtit 2026 në Spitalin Nënë Tereza në Tiranë, në repartin e reanimacionit, për probleme në frymëmarrje.
Gjendja e tij shëndetësore paraqitet e qëndrueshme dhe në përmirësim. Mjekët e ekipit të aritmologjisë, pas konsultës së zhvilluar më 5 shkurt 2026, i kanë vendosur një pacemaker me dy dhoma.
Pacemaker-i është një pajisje mjekësore që ndihmon zemrën të rrahë rregullisht kur ritmi i saj është shumë i ngadalshëm ose i çrregullt. Ish-presidenti vuante nga rrahjet e ngadalta të zemrës ose bllok atrioventrikular, problem i lidhur me moshën.