Alfred Moisiu, ish-President i Republikës, është dërguar me urgjencë mesditën e 4 shkurt 2026 në Qendrën Spitalore Universitare “Nënë Tereza” (QSUT), pas komplikacioneve shëndetësore.
Burime spitalore kanë bërë të ditur se ai është paraqitur me vështirësi në frymëmarrje dhe menjëherë është shtruar në repartin e Reanimacionit pranë Klinikës së Kardiologjisë. Aty, ndodhet nën monitorim intensiv nga stafi mjekësor.
Parametrat jetësorë të zotit Moisiu janë stabile. Mjekët po vlerësojnë situatën në dinamikë për të përcaktuar momentin e përshtatshëm për të kryer një ndërhyrje të nevojshme. “I gjithë stafi i shërbimit të Kardiologjisë është në gatishmëri për të mbajtur nën kontroll gjendjen e ish-Presidentit”, thonë burimet nga QSUT.
Sipas informacioneve nga A2 CNN, bëhet fjalë për shqetësime kardiake dhe disa vena të bllokuara, ku ish-Presidenti pritet t’i nënshtrohet procedurave sipas protokolleve. Familjarët kanë konfirmuar se gjendja nuk është e rëndë dhe ai nuk është i intubuar. Ata kërkojnë privatësi në këtë situatë.
Gazetarja Sonila Mlloja nga RTSH ka raportuar të njëjtat detaje nga burime spitalore.
Alfred Moisiu, i cili festoi 96-vjetorin në dhjetor 2025, shërbeu si President konsensual nga viti 2002 deri në 2007.
Përditësime
Top Channel raporton se gjendja e ish-Presidentit Alfred Moisiu është stabilizuar pas ndërhyrjes mjekësore dhe pritet të lëshohet nga QSUT nesër.
Mjekët e ekipit të aritmologjisë vendosën të instalojnë një pacemaker me dy dhoma ish-Presidentit Alfred Moisiu, pas konsultës së sotme në Kardiologjinë e QSUT-së.
Ai vuan nga bllok atrioventrikular (rrahje të ngadalta të zemrës), i lidhur me moshën.
Gjendja e tij është e qëndrueshme dhe në përmirësim.