Medat Spahiu, i lindur më 10 prill 1935 dhe banues në Xhafzotaj, Durrës, ka ndërruar jetë rreth orës 14:10 të datës 3 prill 2026 në Reanimacionin Qendror të QSUT-së në Tiranë. Shkak i vdekjes ka qenë embolie pulmonare dexter.
Ai ishte arrestuar më 14 mars 2026 nga Komisariati i Policisë Durrës për veprën penale “Vrasje për shkak të marrëdhënieve familjare, e mbetur në tentativë”. Më 17 mars 2026 ka hyrë në IEVP Durrës, por për shkak të gjendjes shëndetësore është mbajtur nën ruajtje në ambientet e Spitalit Rajonal Durrës, ku ndodhej i shtruar.
Më 19 mars 2026 u transferua në Spitalin “Shefqet Ndroqi” në Tiranë, në pavijonin e pneumologjisë, për trajtim të specializuar. Më 31 mars 2026 doli nga ky spital dhe u shtrua në QSUT.
Gjendja e tij u përkeqësua dhe më 2 prill 2026, rreth orës 22:34, u shtrua me urgjencë në Reanimacionin Qendror, ku u diagnostikua me embolie pulmonare dexter, hipertension arterial, diabet mellitus, gjendje pas A.V.C. dhe frakturë subtrokanterike sinister.
Drejtoria e Policisë së Burgut njoftoi se po zbatohen procedurat për rastin dhe se familjarët si dhe organet përkatëse janë njoftuar.