Mihal Pavllo Mërkuri, 47-vjeçar, lindur më 25 janar 1979 në Sarandë, ka ndërruar jetë rreth orës 04:35 të mëngjesit të 20 janarit 2026 në Reanimacionin Qendror të Pavijonit të Kirurgjisë në Qendrën Spitalore Universitare “Nënë Tereza” (QSUNT). Vdekja ka ardhur si pasojë e arrestit kardiak dhe hemorragjisë në kokë.
Ai ishte i dënuar me 10 vjet burg për veprat penale "vrasje me dashje e mbetur në tentativë" dhe "prodhim e mbajtje pa leje të armëve luftarake dhe municionit". Mërkuri u ekstradua nga Greqia më 20 qershor 2023 dhe u transferua nga IEVP Korçë në IEVP Burrel më 15 shkurt 2025.
I ndjeri u shtrua në QSUNT më 18 janar 2026, rreth orës 20:21, ku iu nënshtrua ndërhyrjes kirurgjikale për hemorragjinë e brendshme (hemoperitoneum). Ai konsiderohej i dënuar i sigurisë së lartë.
Për rastin po zbatohen të gjitha procedurat e përcaktuara ligjore.
Disa burime përmendin se mbrëmjen e 19 janarit 2026 në QSUNT pati ndërprerje të energjisë elektrike në repartin e reanimacionit, që shkaktoi kaos të përkohshëm dhe transferim pacientësh me barela. Sipas njoftimit të QSUNT-it, ndërprerja ishte e shkurtër, pasi u aktivizuan gjeneratorët dhe aparaturat mjekësore jetike funksionuan normalisht.
Përditësime
Mihal Pavllo Mërkuri plagosi me armë zjarri biznesmenin Vendim Bejko në Sarandë në nëntor 2006. U dënua në mungesë me 10 vite burg dhe u shpall në kërkim ndërkombëtar për mbi 11 vjet.
Në 2017, u arrestua në Greqi për trafik droge në Vasilikos, pranë Igumenicës, së bashku me Panajot Demajn. Dyshoheshin për kontrollin rrugor të një furgoni me 214 kg marijuanë, ndërsa dy shqiptarë të tjerë ikën.