Një ngjarje e rëndë është raportuar të enjten në Qendrën Spitalore të Burgjeve, ku Fatmir Qoku, 47 vjeç, është gjetur pa shenja jete në tualetin e dhomës së akomodimit, rreth orës 16:50. Sipas të dhënave paraprake, dyshohet se i ndjeri ka kryer vetëvarje me një mjet personal.
Sipas njoftimit zyrtar, Qoku ishte i dënuar me 25 vite burgim me vendim të formës së prerë të vitit 2007 për veprën penale “Vrasje në rrethana të tjera cilësuese”. I ndjeri vuante nga skizofrenia dhe ishte nën monitorimin e vazhdueshëm të shërbimeve shëndetësore. Gjatë periudhës 2022–2026, ai ishte shtruar disa herë në spital, ndërsa shtrimi i fundit kishte nisur më 28 maj 2026.
Informacionet tregojnë se rreth orës 16:20, viktima ishte vizituar nga personeli mjekësor. Pas konstatimit të vdekjes, personeli shëndetësor dhe ai i sigurisë ndërhynë, por vdekja kishte ndodhur përpara se të zbulohej trupi.
Agjencia e Mbikëqyrjes së Ekzekutimit të Vendimeve Penale ka nisur veprimet hetimore në bashkëpunim me organin e prokurorisë. Drejtoria e Përgjithshme e Burgjeve ka shprehur ngushëllimet për familjarët dhe po bashkëpunon për zbardhjen e rrethanave. Në vitin 2006, Fatmir Qoku, së bashku me Musa Canin, u shpallën fajtorë për vrasjen e Manushaqe Xekës në Elbasan.