Një ngjarje e rëndë është shënuar këtë të martë në burgun e Fierit, ku një i dënuar ka humbur jetën. Viktima është Artur (Gent) Ymer Doku (Sherifi), 52 vjeç, i cili vuante një dënim të mbetur prej 9 vitesh e 5 muajsh burgim për një vrasje të kryer në vitin 1997.
Sipas informacioneve të autoriteteve, 52-vjeçari ishte duke vuajtur një dënim total prej 15 vitesh burgim për veprat penale të vrasjes me paramendim në bashkëpunim dhe armëmbajtjes pa leje, sipas dispozitave të Kodit Penal.
I ndjeri, i cili kishte lindur në Burrel, raportohet se ka pasur probleme të njohura shëndetësore, kryesisht të natyrës kardiake. Pas përkeqësimit të gjendjes së tij, ai është transportuar drejt Spitalit Rajonal të Fierit, ku mjekët kanë konstatuar vdekjen. Bazuar në të dhënat paraprake, nuk ka dyshime për rrethana kriminale.
Trupi i pajetë është dërguar në morg për kryerjen e procedurave mjeko-ligjore të nevojshme. Institucionet përkatëse kanë nisur veprimet procedurale për dokumentimin e plotë të ngjarjes, ndërsa ekspertiza mjeko-ligjore pritet të përcaktojë zyrtarisht shkakun e vdekjes.
Përditësime
Grupi hetimor po shqyrton çarjen e aortës si shkakun kryesor të vdekjes së 52-vjeçarit Artur Doku në burgun e Fierit. Dokumentet zyrtare tregojnë se i ndjeri ka zbritur vetë nga kati i tretë drejt infermierisë, përpara se të shfaqte komplikacione të rënda dhe të dërgohej me urgjencë në spital. Doku ishte dënuar për vrasjen me paramendim të Ilmi Cukës dhe Dalip Cukës, ngjarje e ndodhur më 19 maj 1997 në zonën e 'Bregut të Lumit' në Tiranë, për motive hakmarrjeje.