Specialistët e Seksionit për Hetimin e Krimeve të Rënda në Drejtorinë Vendore të Policisë Fier realizuan arrestimin e shtetasit Kelmend Beqaj, 27 vjeç, banues në Fier.
Ai ishte shpallur në kërkim për veprat penale vrasje me dashje e mbetur në tentativë dhe armëmbajtje pa leje, ose prodhimi dhe mbajtja pa leje e armëve, armëve shpërthyese dhe municionit.
Më 5 janar 2025, Beqaj qëlloi me armë zjarri shtetasin Gledian Hoxhallari, 42 vjeç, për motive të dobëta dhe u largua nga vendngjarja. Sipas disa burimeve, motivi lidhet me një lidhje intime mes Beqajt dhe bashkëshortes së viktimës, Melisa Hoxhallari. Ngjarja ndodhi teksa Hoxhallari priste për t’u takuar me bashkëshorten e tij. Pas ngjarjes, Melisa Hoxhallari u arratis me Beqajin, por më vonë u vetëdorëzua në polici.
Arrestimi u bë në Pikën Kufitare të Kakavijës nga shërbimet e Policisë Kufitare, pas mbi një viti në arrati.
Gjykata caktoi masën e sigurisë arrest me burg. Materialet procedurale u referuan Prokurorisë së Fierit për veprime të mëtejshme.