Policia e Fierit ekzekutoi urdhrin e Prokurorisë për ndalimin e Agim Gashit, 38 vjeç, banues në Fier. Gjykata e Fierit caktoi ndaj tij masën e sigurisë arrest me burg për veprat penale vrasje me paramendim dhe mbajtja pa leje dhe prodhimi i armëve, armëve shpërthyese dhe i municionit.
Ngjarja ndodhi më 7 dhjetor 2023, në lagjen 16 Prilli të Fierit. Agim Gashi dyshohet se, në bashkëpunim me vëllain e tij K. G., i cili ndodhet në paraburgim në IEVP Fier, qëlloi me armë zjarri drejt automjetit të drejtuar nga Elton Javori, 41 vjeç. Viktima humbi jetën në vendngjarje pas një konflikti për motive të dobëta.
Sipas detajeve, automjeti i autorëve u bë paralel me makinën e viktimës. Nga krahu i pasagjerit të Benzit të tyre u qëllua drejt saj. Viktima kishte një pistoletë dhe shkëmbeu zjarr me autorët. Pas të shtënave, automjeti i autorëve u largua, ndërsa Javori drejtoi makinën për disa metra para se të ndalonte në anë të rrugës.
Zanafilla e konfliktit dyshohet të jetë një zënkë dhjetë ditë para ngjarjes në një lokal të Fierit. Elton Javori dhe Agim Gashi kishin qenë dikur miq, por debati verbal u shoqërua me goditje me grusht nga ana e viktimës ndaj të arrestuarit.
Përditësime
Policia e Shtetit ka arrestuar Agim Gashin për vrasjen e Elton Javorit në Fier, më shumë se dy vjet pas ngjarjes së 7 dhjetorit 2023.