Ish-presidenti i Brazilit Jair Bolsonaro u shtrua të premten në një njësi kujdesi intensiv të spitalit DF Star në Brasilia, pasi u diagnostikua me bronkopneumoni. Sipas një shënimi mjekësor dhe postimit në Instagram nga bashkëshortja e tij Michelle Bolsonaro, ai u dërgua në spital herët në mëngjes me temperaturë të lartë, të dridhura dhe rënie të nivelit të oksigjenit.
Mjeku që e trajtoi, Brasil Caiado, u shpreh se gjendja e Bolsonaro-s është e rëndë dhe ai pritet të qëndrojë në spital për disa ditë. Për momentin, ndërhyrja kirurgjikale është përjashtuar. Ai trajtohet me antibiotikë.
Bolsonaro, i cili qeverisi nga viti 2019 deri në 2022, ka histori të gjatë problemesh shëndetësore. Ai u godit me thikë në bark gjatë një aktivititi zgjedhor në vitin 2018, çka ka çuar në shtrime të shumta dhe operacione. Së fundmi, në janar u shtrua për ekzaminime pas një rënieje ku goditi kokën, ndërsa në dhjetor iu nënshtrua procedurave për hernie dhe lemzë të vazhdueshme, të shoqëruara me të vjella.
Ai vuan dënim 27 vjet burg për përpjekje grushti shteti pas humbjes në zgjedhjet presidenciale të vitit 2022 kundër presidentit aktual Luiz Inacio Lula da Silva. Gjykata e Lartë ka refuzuar kërkesën e avokatëve për vuajtje të dënimit në arrest shtëpiak. Djali i tij, Flavio Bolsonaro, deklaroi se "po luhet me jetën e babait të tij".