Të paktën 30 persona u plagosën pasditen e së dielës, më 25 janar 2026, në Brasilia të Brazilit, kur një rrufe goditi një tubim mbështetësish të ish-presidentit Jair Bolsonaro. Ngjarja ndodhi mes reshjeve të dendura të shiut, sipas shërbimit zjarrfikës.
Mijëra protestues ishin mbledhur pranë Monumentit JK, në boshtin monumental qendror të qytetit, në pritje të një marshimi në mbështetje të Bolsonaro-s. Tubimi u organizua nga deputeti federal Nikolas Ferreira.
Rrufeja ra pak para orës 13:00. Autoritetet ngritën menjëherë një tendë emergjence për ndihmën e parë. Në total, 72 persona morën trajtim mjekësor, ndërsa 30 prej tyre u transportuan në spitalet e qytetit. Të paktën tetë persona ndodhen në gjendje të rëndë shëndetësore.
Demonstrata u zhvillua në mbështetje të Jair Bolsonaro-s, i cili është dënuar me 27 vjet burg për tentativë grushti shteti dhe mbahet aktualisht në një institucion korrektues në zonën e gjerë të Brasilias.