Klubi i futbollit FC Liria nga Prizreni ka njoftuar zyrtarisht se trajneri Ismet Munishi do të mbetet në krye të skuadrës edhe për tre vitet e ardhshme. Vendimi për vazhdimin e kontratës është bërë i ditur përmes kanaleve zyrtare të klubit, duke u theksuar si një ndër hapat e parë të projektit të ri sportiv.
Sipas drejtuesve të FC Lirisë, projekti mbështetet në parimet e stabilitetit, besimit dhe një vizioni afatgjatë. Klubi shprehu besim të plotë te përvoja dhe profesionalizmi i trajnerit Munishi, duke e vlerësuar atë si një figurë kyçe për ndërtimin e një ekipi konkurrues.
Objektivi kryesor i këtij bashkëpunimi është krijimi i një skuadre me identitet të qartë dhe ambicie të mëdha, e cila do të synojë rikthimin e FC Lirisë në nivelet më të larta të garave në futbollin e Kosovës. Në njoftimin e tyre, drejtuesit e klubit shprehën bindjen se ky rrugëtim do të prodhojë rezultate pozitive për tifozët bardhezi.