Donald Trump foli për diplomacinë me Iranin pas takimit të zhvilluar më 11 shkurt me kryeministrin izraelit Benjamin Netanyahu. Ai sinjalizoi vazhdimin e negociatave me Teheranin.
Netanyahu kërkoi që programi raketor i Iranit të përfshihet zyrtarisht në çdo marrëveshje, por Irani e ka refuzuar vazhdueshëm. Rundi i ri i bisedimeve midis SHBA-së dhe Iranit parashikohet më 17 shkurt në Gjenevë.
Analisti i mbrojtjes Hossein Aryan, me bazë në Mbretërinë e Bashkuar, foli për Radion Farda të Radios Evropa e Lirë. Ai argumentoi se qëllimi strategjik i Izraelit shkon përtej çështjes bërthamore dhe synon reduktimin drastik të kapaciteteve mbrojtëse të Iranit, si nën Republikën Islamike, ashtu edhe pas saj.
Sipas Aryan-it, Izraeli e konsideron arsenalin raketor si asetin e vetëm të rëndësishëm ushtarak dhe kapacitetin parandalues të Iranit. Edhe pse vende të tjera rajonale kanë raketa balistike, programi iranian dallohet për prodhimin e brendshëm dhe vetëqëndrueshmërinë.
Vlerësimet izraelite parashikojnë se Irani mund të arrijë 8.000 raketa deri në 2028, nëse nuk kontrollohet. Këto projeksione shpjegojnë shqetësimet për sulme masive të mundshme, që do të rrezikonin sistemet e mbrojtjes raketore. Prandaj, fokusi i Netanyahu-s është te programi raketor, pasi pjesa bërthamore konsiderohet nën kontroll për momentin.