Abbas Araqchi, ministri i Jashtëm i Iranit, sinjalizoi më 30 janar në Stamboll gatishmërinë e Teheranit për të rinisur bisedimet për programin bërthamor me Shtetet e Bashkuara.
Në një konferencë të përbashkët për shtyp me homologun turk, Araqchi tha se bisedimet do të zhvilloheshin nëse kryhen në mënyrë “të drejtë dhe të barabartë”. Ai u shpreh i hapur për masa që ndërtojnë besim lidhur me programin bërthamor, por vendosi vija të kuqe për kapacitetet mbrojtëse dhe raketat. “Kapacitetet mbrojtëse të Iranit dhe raketat nuk do të jenë kurrë subjekt i negociatave”, deklaroi ai, duke shtuar se deri tani nuk ka plane për bisedime mes Teheranit dhe Uashingtonit.
Këto deklarata vijnë në kontekstin e intensifikimit të aktivitetit diplomatik në rajon për të parandaluar një përballje direkte mes SHBA-së dhe Iranit. Presidenti turk Recep Tayyip Erdogan i tha presidentit iranian Masud Pezeshkian se Ankaraja mund të shërbejë si ndërmjetësuese.
Sipas Presidencës turke, Ankaraja është e gatshme të ndihmojë në uljen e tensioneve dhe në zgjidhjen e problemeve ekzistuese. Presidenca iraniane raportoi se Pezeshkian vuri kushtin se çdo cikël bisedimesh varet nga braktisja e “veprimeve kërcënuese në rajon”.
Analisti Ali Vaez, drejtor i projektit për Iranin në Grupin Ndërkombëtar të Krizave, argumenton se qëndrimi negociues i Teheranit ka mbetur i pandryshuar që nga fillimi i vitit 2025, pavarësisht presionit në rritje. “Republika Islamike as nuk di dhe as nuk është e gatshme të mësojë se çfarë qasje të ketë ndaj presidentit amerikan Donald Trump”, tha Vaez për Radion Evropa e Lirë.