Forcat Mbrojtëse të Izraelit (IDF) kanë konfirmuar nisjen e sulmeve ajrore të synuara kundër objektivave ushtarake në kryeqytetin iranian, Teheran, dhe në kryeqytetin libanez, Bejrut. Deklarata zyrtare e IDF-së bën të ditur se sulmet janë të njëkohshme.
Sulmet në Bejrut vijnë rreth një orë pasi IDF lëshoi një paralajmërim urgjent për banorët e periferive jugore të qytetit dhe për dhjetëra fshatra përreth. Zëdhënësi i IDF-së në gjuhën arabe, Avichay Adraee, u bëri thirrje qytetarëve të evakuojnë menjëherë shtëpitë, duke i paralajmëruar të qëndrojnë larg ndërtesave të lidhura me Hezbollahun.
Sipas IDF-së, objektivat përfshijnë qendra komande dhe depo armësh që i përkasin Hezbollahut. Në qiellin e hershëm të mëngjesit mbi Bejrut janë parë re të dendura tymi të zi, ndërsa agjencia Reuters raportoi për shpërthime të forta në zonë.
IDF thekson se kushdo që ndodhet pranë këtyre objektivave rrezikon jetën dhe ka paralajmëruar për një valë të gjerë sulmesh ajrore.
Përditësime
IDF goditi dhjetëra objektiva ushtarake në Teheran, duke përfshirë selinë e Basij (lidhur me IRGC), platformat e raketave, sistemet e mbrojtjes ajrore dhe Drektorinë e Furnizimit/Logjistikës së forcave tokësore iraniane.
IDF deklaroi se do të vazhdojë të intensifikojë sulmet ndaj infrastrukturës ushtarake të Iranit.
Urdhri i evakuimit specifikohet për zonën Haret Hreik në Bejrutin jugor.