Ministria e Jashtme e Izraelit njoftoi se kryeministri Benjamin Netanyahu dhe ministri i jashtëm Gideon Sa’ar kanë udhëzuar nisjen e një padie për shpifje kundër gazetës The New York Times.
Padia lidhet me artikullin e kolumnistit Nicholas Kristof të botuar në gazetë, ku pretendohet se të burgosur palestinezë kanë pësuar abuzime seksuale dhe keqtrajtime gjatë ndalimit nga autoritetet izraelite. Kristof deklaron se ka intervistuar 14 burra dhe gra palestineze dhe ka cituar raporte të organizatave si B’Tselem, Save the Children dhe Komiteti për Mbrojtjen e Gazetarëve, si dhe një raport të OKB-së.
Në deklaratën zyrtare të shpërndarë në platformën X, autoritetet izraelite e cilësuan artikullin si “një nga gënjeshtrat më të rënda dhe më të shtrembëruara të publikuara ndonjëherë kundër Shtetit të Izraelit”. Ata theksuan se do të ndërmerren hapa ligjorë kundër gazetës dhe përgjegjësve për publikimin.
Artikulli i Kristofit përmend raste të dhunës fizike, përdhunimit me objekte dhe poshtërimit të të ndaluarve, por nuk paraqet prova se udhëheqja izraelite ka dhënë urdhra të drejtpërdrejtë për këto veprime.