Ushtria e Izraelit lëshoi një paralajmërim për evakuim banorëve në jug të Bejrutit, kryeqytetit të Libanit, për operacione ushtarake të parashikuara në orët në vijim.
Zëdhënësi i ushtrisë izraelite, Avichay Adraee, deklaroi se Forcat Mbrojtëse të Izraelit do të veprojnë në zonat Haret Hreik dhe Burj al-Barajneh, si dhe në një kompleks në jug të Autostradës së Damaskut. Ai u bëri thirrje banorëve të largohen menjëherë dhe të lëvizin drejt lindjes përgjatë autostradës për sigurinë e tyre.
Sipas ushtrisë izraelite, operacionet kanë në shënjestër grupin Hezbollah, i mbështetur nga Iran. IDF paralajmëroi se kushdo që ndodhet pranë operativëve, objekteve apo armëve të Hezbollahut rrezikon jetën e tij.
Më herët gjatë natës, ushtria izraelite kishte paralajmëruar për sulme në periferinë jugore të Bejrutit, në zonën Dahieh. Pamje të verifikuara tregojnë dëme nga sulmet ajrore në lagjen Tallet el Khaya në Bejrutin perëndimor, ku disa kate të një ndërtese të lartë janë përfshirë nga flakët.