Kryeministri izraelit Benjamin Netanyahu ka urdhëruar një grup ministrash dhe zyrtarësh të lartë të nisin përgatitjet për një procedim ligjor kundër presidentit turk Rexhep Tajip Erdogan në Gjykatën Ndërkombëtare Penale në Hagë. Sipas raportimeve të agjencisë izraelite i24NEWS, fokusi i kësaj dosjeje do të jetë mbi politikat e qeverisë turke ndaj pakicës kurde, si dhe mbi akuzat për mbështetje financiare ndaj Hamasit.
Ky veprim shihet si një përshkallëzim i tensioneve diplomatike midis dy shteteve, duke pasur parasysh se Erdogan më herët kishte njoftuar se i është drejtuar Interpolit për të kërkuar arrestimin e Netanyahu-t, duke e akuzuar atë për gjenocid. Përfaqësuesit izraelitë po shqyrtojnë mënyra të ndryshme për procedimin e çështjes, duke përfshirë mundësinë e referimit përmes një shteti të tretë.
Sipas burimeve të cituara nga mediat, autoritetet izraelite nuk synojnë domosdoshmërisht përfundimin e procesit gjyqësor. Përgatitja e dosjes po shihet më tepër si një instrument presioni diplomatik dhe një masë parandaluese ndaj presidentit turk. Vlen të theksohet se as Izraeli dhe as Turqia nuk janë palë në Statutin e Romës, dokumenti themelues i Gjykatës Ndërkombëtare Penale.
Deri në këto momente, as Zyra e Kryeministrit të Izraelit dhe as Ministria e Drejtësisë nuk kanë dhënë komente zyrtare lidhur me këto raportime. Për momentin, bëhet fjalë për faza përgatitore dhe jo për një proces të nisur formalisht në institucionet gjyqësore ndërkombëtare.