Izraeli po përgatitet për një operacion tokësor të gjerë në jug të Libanit, me qëllim shkatërrimin e forcave të Hezbollahut në zonën në jug të lumit Litani. Këtë e raporton media amerikane Axios, duke cituar zyrtarë izraelitë dhe amerikanë.
Operacioni parashikon hyrjen e trupave izraelite në të gjithë territorin në jug të lumit Litani dhe eliminimin e infrastrukturës ushtarake të Hezbollahut në atë zonë. Zyrtarët e cituar thonë se ky do të jetë operacioni më i madh ushtarak i Izraelit në Liban që nga lufta e vitit 2006.
Një zyrtar i lartë izraelit deklaroi për Axios: "Ne do të bëjmë atë që bëmë në Gaza", duke nënkuptuar një ofensivë të ngjashme me operacionet në Rripin e Gazës. Përgatitjet erdhën pas sulmit të Hezbollahut ndaj Izraelit, gjatë të cilit u lëshuan më shumë se 200 raketa drejt territorit izraelit. Sulmi dyshohet se u krye në koordinim me Gardën Revolucionare të Iranit (IRGC).
Nëse realizohet, ky operacion mund të përshkallëzojë tensionet në rajon dhe të hapë një front të ri konflikti në kufirin Izrael-Liban.
Përditësime
Të paktën katër persona u vranë në një sulm ajror izraelit në Taamir, Haret Saida, në jug të Libanit.
- Një zyrtar izraelit deklaroi: "Para këtij sulmi ne ishim gati për një armëpushim në Liban, por pas tij nuk ka kthim prapa nga një operacion masiv."
- Shefi i Shtabit të IDF-së, Eyal Zamir, urdhëroi përforcimin e gjerë të trupave në Komandën Veriore të premten, duke përfshirë Divizionin 98-të, dy brigade luftarake dhe batalione xhenierie.