Klubi i Real Madrid është në fazat përfundimtare të transferimit të sulmuesit Jacobo Ortega te skuadra franceze Strasbourg. Operacioni, i cili kap vlerën e rreth 10 milionë eurove, është cilësuar si shitja më e shtrenjtë e një talenti nga akademia madrilene që largohet pa regjistruar asnjë paraqitje për ekipin e parë.
Sipas kushteve të marrëveshjes, Real Madrid do të ruajë 30 për qind të të drejtave ekonomike mbi lojtarin, çka do t'i mundësonte klubit të përfitojë financiarisht në rast të një shitjeje të ardhshme. Gjithashtu, marrëveshja pritet të përfshijë një klauzolë që do t'i jepte mundësinë klubit spanjoll ta rikthejë 20-vjeçarin në të ardhmen kundrejt një shume të reduktuar. Për shërbimet e lojtarit shfaqi interesim edhe klubi spanjoll i Elche, i cili u fut në negociata në fazat e fundit.
Strasbourg e ka identifikuar Ortega-n si përforcim kyç për repartin ofensiv, pas largimit të Emmanuel Emeghas drejt Chelsea. Nën drejtimin e trajnerit Hugo Oliveira, sulmuesi do të konkurrojë për një vend në formacion me Joaquin Panichelli, Sekou Mara dhe Milos Lukovic. Ky largim bëhet pjesë e një tendence të përgjithshme te Real Madrid këtë verë, ku lojtarë të tjerë të akademisë, si Gonzalo Garcia, Cesar Palacios dhe Mario Martin, kanë zgjedhur të largohen për të kërkuar më shumë hapësira aktivizimi.