Fushata e vaksinimit kundër gripit sezonal vijon në të gjithë vendin, me fokus te mbrojtja e grupeve më të rrezikuara nga format e rënda dhe ndërlikimet. Deri më 30 tetor 2026 janë administruar 125 676 doza. Sipas të dhënave paraprake, rreth 75% e tyre u janë dhënë personave mbi 65 vjeç, ndërsa gjatë kësaj periudhe është vaksinuar rreth 22% e personelit shëndetësor.
Në kuadër të fushatës janë shpërndarë 280 mijë doza të vaksinës trevalente, e cila mbron ndaj tri viruseve të gripit sezonal: A(H1N1), A(H3N2) dhe B të linjës Victoria. Fushata nisi në fillim të tetorit dhe përfshin personelin shëndetësor dhe grupet me rrezik të shtuar, me përparësi të moshuarit dhe personat me sëmundje kronike.
Ministrja e Shëndetësisë dhe Mirëqenies Sociale, Klodiana Spahiu, vizitoi Qendrën Shëndetësore të Specialiteteve Nr. 1 në Tiranë, e shoqëruar nga drejtoresha e Institutit të Shëndetit Publik, Dorina Toçi. Ajo u njoh me ecurinë e fushatës, organizimin e vaksinimit dhe angazhimin e strukturave shëndetësore në vend.
Gjatë vizitës, Spahiu bëri thirrje për rritjen e pjesëmarrjes së personelit shëndetësor në vaksinim. Ajo e cilësoi imunizimin si përgjegjësi profesionale, përtej mbrojtjes individuale. Vaksinimi i mjekëve, infermierëve dhe profesionistëve të tjerë të shëndetësisë synon të ulë rrezikun e transmetimit të virusit te pacientët, veçanërisht te personat me imunitet të dobësuar ose me gjendje shëndetësore të rënduar, si dhe të ndihmojë në vijimësinë e shërbimeve gjatë sezonit të gripit.
Ministrja theksoi nevojën për rritjen e mbulimit me vaksinë në strukturat spitalore, veçanërisht në spitalet terciare dhe shërbimet me fluks të lartë pacientësh, ku masat parandaluese lidhen me sigurinë e kujdesit shëndetësor.
Ministria e Shëndetësisë dhe Mirëqenies Sociale, në bashkëpunim me Institutin e Shëndetit Publik dhe strukturat shëndetësore në vend, vijon punën për rritjen e mbulimit me vaksinë dhe ndërgjegjësimin e qytetarëve. Sipas ministrisë, synimi është mbrojtja e grupeve më të rrezikuara, parandalimi i ndërlikimeve dhe siguria e pacientëve gjatë sezonit të gripit.