Kuvendi i Përgjithshëm i Lidhjes Demokratike të Kosovës (LDK) ka miratuar një sërë vendimesh, mes të cilave edhe atë për detyrimin e anëtarëve dhe deputetëve të Grupit Parlamentar për të zbatuar vendimet e organeve kompetente të partisë. Ky vendim është ndërmarrë pas një kuvendi të jashtëzakonshëm, ku u konfirmua Lumir Abdixhiku në krye të partisë, pavarësisht kërkesave të një pjese të delegatëve për shkarkimin e tij.
Në vendimin e Kuvendit thuhet: "Të gjithë anëtarët, zyrtarët, të zgjedhurit dhe përfaqësuesit e LDK-së obligohen t’i respektojnë dhe t’i zbatojnë vendimet e miratuara nga organet kompetente të Partisë, në përputhje me Statutin, përfshirë dhe këtë të sotmin".
Pas këtyre zhvillimeve, deputetja Janina Ymeri ka reaguar përmes rrjeteve sociale, duke shprehur mospajtimin e saj. Ajo ka publikuar pjesë nga neni 70 i Kushtetutës së Republikës së Kosovës, ku përcaktohet se deputetët e Kuvendit janë përfaqësues të popullit dhe nuk i nënshtrohen asnjë mandati detyrues. Deputetja Ymeri e ka shoqëruar këtë postim me shënimin: "KOSOVA 🇽🇰 Djep i Demokracisë ❤️".
Vendimi i Kuvendit të partisë thekson gjithashtu se orientimi kryesor politik është stabiliteti institucional, funksionalizimi i plotë i institucioneve dhe shmangia e zgjedhjeve të jashtëzakonshme nacionale. Megjithatë, brenda Grupit Parlamentar të LDK-së vazhdojnë të ekzistojnë qëndrime të ndryshme lidhur me një marrëveshje të mundshme me Lëvizjen Vetëvendosje.
Përditësime
Deputeti Arben Gashi i është bashkuar deputetes Janina Ymeri në kundërshtimin e vendimeve të Lidhjes Demokratike të Kosovës (LDK), duke sfiduar linjën zyrtare lidhur me negociatat me Lëvizjen Vetëvendosje. Ky zhvillim konfirmon formimin e një grupi kundërshtues brenda LDK-së, ndërsa udhëheqësia partiake ka paralajmëruar masa disiplinore për deputetët që shpërfillin qëndrimet e organeve drejtuese.