Ish-deputetja e Lidhjes Demokratike të Kosovës (LDK), Janina Ymeri, ka reaguar ndaj zërave për përçarje brenda partisë, duke i cilësuar ato si propagandë. Reagimi erdhi pas mungesës së saj në tubimin e së dielës, të quajtur “Tubimi i Bashkimit”, ku mori pjesë edhe Vjosa Osmani.
Në një postim në rrjetet sociale, Ymeri theksoi se nuk ekziston asnjë ndarje në LDK dhe premtoi pjesëmarrje në tubimin hapës të fushatës së bashku me kryetarin Lumir Abdixhiku. Ajo bëri të ditur se ka marrë pjesë rregullisht në mbledhjet e degës së LDK-së në Ferizaj, së bashku me kandidatët e partisë dhe listën “Vjosa”.
Ymeri akuzoi Lëvizjen Vetëvendosje (VV) dhe “satelitët” e saj për një fushatë linçimi kundër LDK-së. “Është kohë linçimi, për VV-në e satelitët e saj, më pyesni mua”, shkroi ajo.
Në të njëjtin tubim munguan edhe Avdullah Hoti, Hykmete Bajrami, Kujtim Shala dhe Imri Ahmeti. Kryetari Lumir Abdixhiku u shpreh se të gjithë do të jenë pjesë e listës së LDK-së për deputetë dhe kërkoi që mungesa e tyre të mos bëhet temë e paqenë.