Kryeministrja e Japonisë, Sanae Takaichi, ka njoftuar se vendi do të nisë lirimin në treg të një pjese të rezervave kombëtare të naftës duke filluar nga dita e enjte, më 26 mars, në Tokio.
Gjatë një deklarate për shtyp, ajo theksoi se kjo masë synon të stabilizojë tregun dhe të garantojë furnizimin e brendshëm me energji. Në një postim në platformën X, Takaichi shkroi se “nga kjo javë, më 26, ne do të fillojmë të lëshojmë rezervat kombëtare”.
Japonia ka ndërmarrë tashmë masa paraprake duke përdorur rezervat private javën e kaluar për të siguruar sasinë e nevojshme. Autoritetet japoneze do të vazhdojnë të monitorojnë situatën dhe të marrin hapa shtesë nëse lind nevoja.
Vendimi vjen mes tensionesh në Lindjen e Mesme, ku rreth 95% e naftës që përdor Japonia kalon përmes Ngushticës së Hormuzit, një pikë kyçe për transportin ndërkombëtar dhe zonë e ndjeshme gjeopolitikisht.