Vendimi i trajnerit të Kombëtares shqiptare, Rolando Maran, për të mos e përfshirë Jasir Asanin në listën e futbollistëve të grumbulluar, ka shkaktuar reagimin e sulmuesit nga Shkupi. Përmes rrjeteve sociale, Asani shprehu pakënaqësinë e tij, duke iu referuar kontributit të tij të mëparshëm me ekipin kombëtar. “Po rri urtë se e di veten. Historia nuk harrohet kurrë. Më mirë të mos flas më”, ka shkruar ai në postimin e tij.
Ky është grumbullimi i dytë radhazi në të cilin sulmuesi, i cili ishte një ndër lojtarët kyç gjatë kualifikueseve të Europianit 2024, nuk bëhet pjesë e planeve të trajnerit italian. Pavarësisht formës së mirë që po kalon me klubin e Esteghlal në Iran, ku ka arritur të realizojë 4 gola dhe 2 asistime në këtë fillim sezoni, paraqitjet e tij nuk kanë qenë të mjaftueshme për të bindur stafin teknik.
Në listën prej 29 futbollistësh të përzgjedhur për ndeshjet e Ligës së Kombeve, përveç Jasir Asanit, trajneri Maran ka lënë jashtë edhe lojtarë të tjerë të rëndësishëm të ekipit, si Armando Broja dhe Nedim Bajrami.